Gham e Mustafa

ame mustafa mila to sab gham mit gaye
Sab se aala hai aala humara nabi
Do jahan ka hai dulha humara nabi
Yun to duniya mein kai gham hain kai dard hain har koi apni apni zaati  pareshaniyon mein uljha hua hai .Aaj konsa aisa dil hai jis mein koi dard na ho .Khushyan to bas khush rang titliyan hain ,iss dil ke chaman mein bas thodi dair aati hain jitne lamhe rehti hain humara man moh leti hain lekin kuch hi lamhon ke baad ye khush rang titliyan apne saath sabhi muskrahaton ke khush rang phool bhi saath le jaati hain aur insaan ke paas jo bachta hai wo hota hai dard aur gham ,ek kasak ke ye khushyan daaime nahin aarzi hain .kuch hi pal reh kar hathon ki hatheliyon se phisal ker chali jaati hain aur humare haath khali reh jaate hain
Khushi aur gham zindagi ke saath lage hain kamyabi nakami bhi insaan ke saath judi rehti hai. Aaj ka insaan kamyabi p
aane ki jiddojahed mein laga hai aor iss bhag doud mein ye bhool gaya hai ki uska maqsade hayat kya hai wo jis maqsad ko paane ki jiddojahed mein laga hai wo kitna paaedar hai .Aaj har insaan apne dil ke dard ko mitane ke liye dusron ki khushyan cheenne ki koshish mein laga hai .Apne gham ko door karne ke liye dusron ki jholi mein dukh bhar raha hai .Khud aage rehne ke chakker mein dusron ko thokar se giradene mein bhi hichkichahat mehsoos nahin karraha .Aaj ka insaan itna khudgarz ho gaya hai ke bhai bhai ka dushman ho gaya hai .Baap bete dushman ho gaye hain aor is dushmani wo hasad mein ek dusre ke rishte ka ehteraam tak karna bhool gaye hain.
Aaj main apne atraf nazrein doudati hoon to har taraf ek nafsa nafsi ka aalam hai .kisi ko kisi se koi garz nahin balki sirf gharz ki had tak rishtedari nibhai ja rahi hai .aisa kyon ho raha hai?kya hum bhool gaye hain ke humare kandhon parkhudaye taala ne kaisi bhaari zimmedari daali hai humare deen ko poori duniya mein aam karne ki zimmedari aur iss zimmedari se nazrein churaye hum apni hi dunya mein magasn hain apne aجpne dukhon pareshaniyon mein uljhe huye ,koi kehta hai mera beta naafarmaan hai ,koi berozgari se pareshan hai ,koi aolad ki nemat se mehroom hai aur jiss ke paas ye nemat hai wo unki khushyan dekhne ke liye taras rahe hain har insaan ke paas gham hain dukh hain dard hain magar main poochti hoon kya aapke paas ghame mustafa hai ?kyunki jiske paas yeh gham hai uske to saare gham mit jayenge .Aap aazma lijye dil mein darde mustafa ho to kis tarah saare dukh dard apne aap mit jaate hain .Koi pareshani pareshani nahin rehti koi nakami nakami nahin rehti koi beemari beemari nahin rehti kunki mareeze mustafa hona hi shifa paana hai ghame mustafa ka hona hi khushi paana hai ،aor aisi khushi jo daaemi ho aur yehi khushi dunya wo aakhirat mein bhi aapke saath rahegi .
Jis dil mein ishq  e mohammedi ho us dil ka kya kehna aur jis dil mein mohaamed sall allaho alaehi wo sallam par aur unke islam par qurbaan jaane ka jazba ho us dil par hum qurbaan ,ye ishq aisa nahin jo fana ho yehi ishq to humari baqa hai.Iss liye ye dard bahut badi doulat hai jisko mil jaye wo ghani hai aur iss daulat ko sanbhal kar rakhna chahiye .
Mere aansu bahut qeemti hain in se wabasta hain unki yaadein
Inki manzil hai khake madina ye guher yunhi kaise lutaoon
Iss doulat ke aage dunya ki har doulat be maane hai aur iss dard ke aage dunya ki saari rahatein bemaane hai aur iss range ishq ke aage saare rang pheeke nazar aate hain.
Iss liye aiy momino tamam ghamon ko bhool jaao aur yaad rakho to bas mere aaqa sall allahu alaihi wo sallam ka paigham ,mere aaqa ki ahadees ,sunnaton ki pairwi ,apne dil mein wo dard paida karo jo unke sahaba ke dil mein tha ,wo dard jo hazrat Bilaal ki aawaz mein tha ,jo mohabbat hazrat abu bakar ko hazrat mohammed sallaalahu alaihi wasallam se thi ya wo jazba jo hazrat Ali mein itni kam umri mein tha ke aap sallallahu alaihi wa sallam par be jhijhak imaan le  aaye the.
Yaad rakhen ke jisne aap ka daaman thaama uske donon jahan sanwar gaye uske saare gham mit gaye aur uske daaman mein dher saari khushyan hi khushysn reh gayeen .Aakhir mein main yahi dua karoongi ke har dil mein Allah taala mohammed sallallahu alaihi wo sallam ki mohabbat daal de aur har dil mein ishqe mohammedi ki kasak dal de.
Aameen